Raza Musani 
غزہ: صیہونی فوج نے غزہ میں قیامت برپا کردی۔ رات سے جاری وحشیانہ بمباری میں شہدا کی تعداد سات سو سے تجاوز کرگئی جبکہ سینکڑوں افراد زخمی ہیں۔ صیہونی جنگی طیاروں نے شمالی غزہ میں الشاطی اور البلاد کیمپ جبکہ وسطی غزہ میں البریج مہاجر کیمپ کو نشانہ بنایا۔ جنوبی غزہ میں رفح اور خان یونس میں بھی رہائشی عمارتوں پر بمباری کی گئی۔ سب سے زیادہ شہادتیں الشاطی کیمپ میں ہوئیں جہاں 200 سے زائد افراد جان سے گئے۔ خان یونس اور رفح میں بھی بڑی تعداد میں فلسطینی شہید ہوئے۔ درجنوں عمارتیں ملبے کا ڈھیر بن گئیں۔ ہسپتال زخمیوں سے بھر گئے۔ اسرائیلی درندگی کا شکار شہدا کی تعداد 6 ہزار کے قریب جاپہنچی۔ جبکہ 15 ہزار سے زائد زخمی ہیں۔ اقوام متحدہ نے کہاہے کہ اس کے بھی چھ ارکان حملوں کا نشانہ بنے ہیں۔ ادھر شمالی غزہ کا سب سے بڑا انڈونیشی اسپتال ایندھن ختم ہونے کے باعث تاریکی میں ڈوب گیا۔ تاہم کچھ دیر بعد بجلی بحال ہوگئی لیکن یہ نہیں معلوم کہ کب تک بحال رہے گی۔
