اتحادی ہونے کا مطلب کسی کی جاگیر ہونا نہیں ہے، ایمانوئل میکرون

ایمسٹرڈیم : فرانسیسی صدر ایمانوئل میکرون نے تائیوان پر اپنے بیان کا دفاع کرتے ہوئے کہا ہےکہ فرانس امریکی پالیسیوں کا پیروکار نہیں ہے۔ ایمسٹرڈیم میں ڈچ وزیر اعظم مارک روٹے کے ساتھ نیوز کانفرنس میں فرانسیی صدر ایمانوئل میکرون نے تائیوان پر امریکی پالیسی کو مسترد کردیا۔ انہوں نے کہاکہ فرانس اب بھی تائیوان پر اسٹیٹس کو کا حامی ہے۔ ان کا ملک چین کے ساتھ تنازع میں امریکی سخت گیر افراد کی پیروی نہیں کرے گا۔ انہوں نے کہا کہ اتحادی ہونے کا مطلب کسی کی جاگیر ہونا نہیں ہے۔ اس کا مطلب یہ نہیں کہ ہمیں اپنے لیے سوچنے کا حق نہیں ہے۔ میکرون نے گزشتہ ہفتے چین کا دورہ کیا تھا اور کہا تھا کہ تائیوان کے بارے میں فرانسیسی اور یورپی پالیسی تبدیل نہیں ہوئی ۔ انہوں نے یورپ کی اسٹریٹجک خود مختاری کی بھی حمایت کی۔اس دورے کے بعد میکرون نے یورپی رہنماؤں پر زور دیا تھا کہ وہ ایسے تنازعات میں نہ پھنسیں جو ان کے اپنے نہیں ہیں۔