Raza Musani 
سرگودھا : عالم اسلام کی معروف شخصیت، فقیہہ اہلبیت آیت اللہ محمد حسین نجفی المعروف محمد حسین ڈھکو کو سرگودھا میں ان کے مدرسے جامعہ علمیہ سلطان المدارس الاسلامیہ میں سپردلحد کردیا گیا۔ نماز جنازہ میں وفاق المدارس الشیعہ پاکستان کے سیکرٹری جنرل علامہ محمد افضل حیدری اور ملک بھر سے دیگر علماء شریک ہوئے۔ وفاق المدارس الشیعہ پاکستان کے صدر آیت اللہ حافظ ریاض حسین نجفی نے آیت اللہ محمد حسین نجفی کے انتقال پر افسوس اور رنج و الم کا اظہار کرتے ہوئے اسے قومی و ملی نقصان قرار دیا ہے۔ وہ قائدین ملت جعفریہ علامہ سید محمد دہلوی، علامہ مفتی جعفر حسین، شہید علامہ عارف حسین الحسینی اور علامہ ساجد علی نقوی کے قریبی ساتھیوں میں سے تھے۔ آیت اللہ محمد حسین نجفی 1932ء میں جہانیاں شاہ سرگودھا میں پیدا ہوئے۔ ان کی علمی، مذہبی اور قومی خدمات کا عرصہ تقریباً 70 سال پر محیط ہے۔ مرحوم نے حوزہ علمیہ نجف اشرف میں علوم دینیہ حاصل کئے اور وطن واپس آکر خدمت دین میں مصروف ہوگئے۔
