توہینِ قرآن کے قبیح اقدامات کے پیچھے استعماری طاقتیں کارفرما ہیں، آیت اللہ کاظم صدیقی

تہران: تہران کے امام جمعہ آیت اللہ کاظم صدیقی نے کہا ہے کہ قرآن کریم کی بے حرمتی کوئی نیا مسئلہ نہیں بلکہ عالم کفر ہمیشہ سے قرآن کریم سے عناد اور دشمنی رکھتا آیا ہے۔ جمعہ کا خطبہ دیتے ہوئے آیت اللہ کاظم صدیقی نے کہاکہ گذشتہ چند صدیوں میں مغربی دنیا میں انجام پانے والی تمام سرگرمیوں کا مقصد انسانی معاشرے سے روحانیت اور دین کو ختم کرنا رہا ہے۔ آیت اللہ کاظم صدیقی نے مغربی ممالک میں قرآن کریم کی بے حرمتی پر مبنی افسوسناک واقعات کی جانب اشارہ کرتے ہوئے کہا کہ اس سے پہلے امریکہ، برطانیہ، ہالینڈ، بلجیئم اور جرمنی میں بھی قرآن کریم کی بے حرمتی پر مبنی قبیح اقدام انجام پا چکے تھے بعض نادان اور خود فروختہ افراد مغربی حکومتوں کا دامن اس افسوسناک جرم سے دھونے کے درپے ہیں اور یہ موقف اختیار کر رہے ہیں کہ ان واقعات کے پیچھے شدت پسند عناصر کا ہاتھ ہے اور مغربی حکومتوں سے اس کا کوئی تعلق نہیں۔ لیکن حقیقت یہ ہے کہ ان قبیح اقدامات کے پیچھے استعماری طاقتیں کارفرما ہیں اور امام خمینی رح نے ملعون سلمان رشدی کے قتل کا فتوی دیتے وقت بھی خبردار کیا تھا کہ اصل مجرم استعماری ٹولہ ہے اور مغرب پر حاکم خبیث حکومتیں قرآن کریم کو اپنی لوٹ مار میں رکاوٹ محسوس کرتی ہیں۔انہوں نے کہا کہ آج رسول اکرم(ص) اور قرآن کریم کے خلاف صف آرا طاقتیں یہی امریکہ اور برطانیہ ہیں جن میں اسلام سے شدید دشمنی پائی جاتی ہے۔ انشاءاللہ خداوند متعال قرآن کریم کی بے حرمتی کرنے والوں کو سزا دے گا۔