Raza Musani 
نیویارک: اقوام متحدہ کی جنرل اسمبلی نے مقدس کتابوں کے خلاف تشدد کی تمام کارروائیوں کو بین الاقوامی قانون کی خلاف ورزی قرار دینے کی قرارداد منظور کرلی۔ جنرل اسمبلی کے اجلاس می مراکش کی جانب سے قرار داد پیش کی گئی جس میں نفرت انگیز تقاریر کا مقابلہ کرنے کے لیے بین المذاہب اور بین الثقافتی مکالمے اور رواداری کو فروغ دینے کی سفارش کی گئی ہے۔ قرارداد کی اتفاق رائے سے منظوری دے دی۔ قرارداد میں کہا گیا کہ مذہب یا عقیدے کی بنیاد پر تشدد کی تمام کارروائیوں کے ساتھ ساتھ مذہبی علامات، مقدس کتابوں ثقافتی مراکز ۔ عبادات گاہوں اور مزارات پر حملے بین الاقوامی قانون کی خلاف ورزی ہیں۔ قرارداد میں امتیازی سلوک، عدم برداشت اور تشدد کے واقعات بشمول اسلامو فوبیا کی بنیاد پر پیش آنے والے واقعات میں اضافے پر گہری تشویش کا اظہار کیا۔ اس سے پہلے ڈنمارک کے دارالحکومت کوپن ہیگن میں ایک بار پھر قرآن کریم کی بے حرمتی کی گئی اور ترکیہ اور مصر کے سفارتخانوں کے سامنے نسخوں کو آگ لگادی گئی۔
