صیہونی آبادکاروں کے حملوں میں خوفناک حد تک اضافہ ہوا ہے، اقوام متحدہ

نابلس: فلسطین کے مغربی کنارے میں صیہونی آبادکاروں کے حملوں میں خوفناک حد تک اضافہ ہوگیا ہے۔ اقوام متحدہ کے انسانی ہمدردی کے ادارے او سی ایچ اے نے صیہونی آباد کاروں کے فلسطینی عوام اور املاک پر حملوں میں ڈرامائی اضافے سے خبردار کیا ہے۔ اور رپورٹ دی ہے کہ رواں سال کے ابتدائی چھ ماہ میں چھ سو کے قریب واقعات درج کیے گئے ہیں۔ ادارے کی ترجمان جینس لارکے نے بتایا کہ چھ ماہ کے دوران مقبوضہ علاقے میں آباد کاروں کے 591 ایسے حملے ریکارڈ کئے گئے جن میں فلسطینیوں کی ہلاکتیں ہوئیں یا املاک کو نقصان پہنچا ہے۔ ترجمان نے بتایا کہ حملوں میں گذشتہ سال کے مقابلے میں 39 فیصد اضافہ ہوا ہے۔ 2022 میں آباد کاروں نے ہر ماہ اوسط 71 حملے کئے تھے۔ جبکہ رواں سال یہ تعداد 99 رہی۔ انہوں نے کہا 2022 میں ایسے واقعات کی تعداد پہلے ہی سب سے زیادہ تھی جب سے ہم نے 2006 سے ایسے واقعات کو ریکارڈ کرنا شروع کیا ہے۔