علاقائی اقوام کی جدوجہد کے نتیجے میں امریکا کو خطے سے نکلنا پڑے گا، ولی امر مسلمین

تہران: ولی امر مسلمین آیت اللہ سید علی خامنہ ای نے ٹرمپ کے بیانات خود ان کے اور امریکی قوم کیلئے باعث شرم قرار دیدئے۔ اساتذہ اور طلبا کے اجتماع سے خطاب میں ولی امر مسلمین آیت اللہ سید علی خامنہ ای نے کہا کہ ٹرمپ کے بعض بیانات اس قدر پست ہیں کہ وہ جواب دینے کے قابل ہی نہیں۔ٹرمپ نے دعویٰ کیا کہ وہ طاقت کو امن قائم کرنے کے لیے استعمال کرنا چاہتے ہیں۔ یہ کھلا جھوٹ ہے۔ امریکی حکام نے ہمیشہ طاقت کو ظلم، جارحیت، قتل عام اور جنگ کو ہوا دینے کے لیے استعمال کیا ہے۔ سوال یہ ہے کہ امریکہ نے کب طاقت کو صلح اور امن کے قیام کے لیے استعمال کیا؟۔ اس کے باوجود طاقت کو امن و سلامتی کے فروغ کے لیے استعمال کیا جا سکتا ہے اور یہی وجہ ہے کہ ایران اپنی قومی طاقت کو بڑھانے کے لیے ہر روز کوشاں ہے۔ لیکن امریکیوں نے ایسا کچھ نہیں کیا۔ انہوں نے اپنی طاقت کا استعمال کرتے ہوئے صیہونی حکومت کو دس ٹن وزنی بم فراہم کئے جسے غزہ کے بچوں۔ اسپتالوں۔ لوگوں کے گھروں۔ لبنان میں اور جہاں کہیں بھی ہو سکا گرایا۔
ولی امر مسلمین نے غاصب صیہونی حکومت کو مغربی ایشیا کے خطے میں بدعنوانی اور جنگ کا منبع اور انتشار کا ذریعہ قرار دیا۔ انہوں نے کہا کہ صیہونی حکومت جو اس خطے میں ایک خطرناک اور مہلک کینسر کی رسولی ہے، اسے جڑ سے اکھاڑ پھینکنا چاہیے۔ انہوں نے کہا کہ علاقائی اقوام کی جدوجہد کے نتیجے میں امریکہ کو اس خطے سے نکلنا ہوگا اور وہ نکل جائے گا۔