Raza Musani 
تہران: پاکستان اور ایران نے سیکیورٹی اور دفاعی شعبے میں تعاون مزید بڑھانے پر اتفاق کیا ہے۔ آرمی چیف جنرل سید عاصم منیر نے دورہ تہران میں ایرانی چیف آف جنرل اسٹاف میجر جنرل محمد باقری سمیت ایرانی قیادت سے ملاقاتیں کی ہیں۔ ملاقاتوں میں دوطرفہ عسکری، دفاعی، سیکیورٹی اور تعلیمی تعاون بڑھانے پراتفاق کیا گیا۔میجر جنرل محمد باقری نے دونوں ملکوں کے تاریخی تعلقات پر روشنی ڈالی۔ میجر جنرل باقری نے دونوں ممالک کے دیرینہ تعلقات کا حوالہ دیتے ہوئے کہا کہ یہ دونوں پڑوسیوں کے درمیان مختلف شعبوں میں تعاون کو وسعت دینے کی بنیاد ہے۔ آرمی چیف نے ایرانی مسلح افواج کے ہیڈکوارٹرز کا دورہ کیا۔ ہیڈکوارٹرز پہنچنے پر ایرانی چیف آف جنرل اسٹاف میجر جنرل محمد باقری نے ان کا پرتپاک استقبال کیا۔ جنرل عاصم منیر ایران کے دو روزہ دورے پر ہیں جہاں وہ ایرانی مسلح قیادت کیساتھ ساتھ سول قیادت سے بھی ملاقاتیں کریں گے جس میں دو طرفہ امور، دفاعی اور سلامتی کے امور پر مذاکرات ہوں گے۔
