حماس سے تصادم کا خوف، عرب ممالک کا فوج بھیجنے سے انکار

تل ابیب : عرب ممالک نے حماس کا مقابلہ کرنے کے خوف سے غزہ کیلئے مجوزہ امن فوج میں شمولیت سے انکار کردیا ہے۔ اسرائیلی اخبار یدیوت اہرونوٹ کے مطابق امریکا کو غزہ میں سیکیورٹی قائم رکھنے کے لیے بین الاقوامی فورس میں شمولیت کیلئے ممالک تلاش کرنے میں مشکلات کا سامنا ہے۔
رپورٹ کے مطابق کئی ممالک زیادہ تر عرب، امریکی درخواست کو مسترد کر چکے ہیں انہیں خوف ہے کہ حماس کے ساتھ ممکنہ فوجی تصادم ہو سکتا ہے۔ اخبار کے مطابق ٹرمپ کے ایلچی اسٹیو وٹکوف اور داماد جیرڈ کوشنر کئی ممالک سے پس پردہ مذاکرات کر رہے ہیں تاکہ انہیں غزہ میں فوج بھیجنے اور مالی تعاون فراہم کرنے پر آمادہ کیا جا سکے۔ اخبار کے مطابق عرب ممالک کے انکار کے بعد امریکا نے ایشیائی ممالک کا رخ کیا ہے سنگاپور سے بھی درخواست کی گئی ہے جس نے حیرت کا اظہار کیا تاہم فوری آمادگی ظاہر نہیں کی۔