Raza Musani 
کوئٹہ : وفاقی کابینہ نے آپریشن عزم استحکام کیلئے 20 ارب روپے جاری کرنے کی منظوری دیدی، کابینہ سے خطاب میں وزیر اعظم شہباز شریف نے واضح پیغام دیا ہے کہ دہشتگردی کو ختم کرنے کا وقت آگیا ہے، دہشت گردوں کے مذموم ارادے ناکام ہوں گے، خاک میں مل جائیں گے، دہشت گردوں کا خاتمہ کرکے دم لیں گے۔ دہشتگرد پاکستان کی ترقی اور سی پیک روکنا چاہتے ہیں۔ پاکستان اور چین میں فاصلے پیدا کرنا چاہتے ہیں۔ بلوچستان میں دہشت گردی کا مقصد ملک میں خلفشار پیدا کرنا ہے، دہشت گردوں کےلیے کوئی جگہ نہیں۔ وزیراعظم کا کہنا تھا کہ شہدا کی قربانیاں رائیگاں نہیں جائیں گی، افواجِ پاکستان اور سپہ سالار پُرعزم ہیں، اس مقصد کے لیے افواجِ پاکستان کو تمام وسائل مہیا کریں گے۔انہوں نے یہ بھی کہا کہ پاکستان کے آئین اور جھنڈے کو تسلیم کرنے والوں سے بات چیت کے راستے کھلے ہیں، دشمن کے ساتھ نہ بات چیت ہوسکتی ہے نہ نرم رویہ اختیار کیا جاسکتا ہے۔
