ترکیہ اور شام میں ایک اور زلزلہ

انقرہ : ترکیہ اور شام کے زلزلے سے متاثرہ علاقوں میں زلزلے کے نئے جھٹکوں نے درجنوں افراد کو ملبے تلے دبادیا۔ ترکیہ میں پیر کی رات 8 بج کر 4 منٹ پر چھ اعشاریہ چار اور ایک منٹ بعد پانچ اعشاریہ آٹھ کے زلزلے نے خوف کی لہر دوڑادی۔ ان جھٹکوں سے دونوں ممالک میں پہلے زلزلے سے تباہ شدہ اور کمزور عمارتیں منہدم ہوگئیں۔ درجنوں افراد ملبے تلےدب گئے۔اور امدادی کارکنوں نے ایک بارپھر ملبے تلے دبےافراد کی تلاش شروع کردی۔ اب تک تین ہلاکتوں اور دوسو سے زائد افراد کے زخمی ہونے کی تصدیق ہوئی ہے۔ وزیرداخلہ سلیمان سویلو نےکہا کہ تین اموات انطاکیے۔ ڈیفنے اور سمندگ میں ہوئیں انہوں نے خطرناک عمارتوں میں داخل نہ ہونےکی اپیل کی ہے۔ چھ فروری کوآنے والے زلزلوں میں ترکیہ اور شام میں 46 ہزار سے زائد افراد ہلاک اور لاکھوں بے گھر ہو گئے تھے۔