غزہ پر حملوں میں مزید 30 افراد شہید، حماس اور اسرائیلی فوج میں شمال مغربی غزہ میں شدید لڑائی

غزہ: غزہ پر اسرائیل کی وحشیانہ بمباری چوبیس ویں روز بھی جاری ہے۔ صیہونی فوج نے القدس اسپتال کے قریب حملہ کردیا۔ اطراف کی کئی عمارتیں تباہ ہوگئیں۔ صیہونی حملوں میں مزید 30 افرادشہید ہوگئے۔ گذشتہ روز صیہونی طیاروں نے چلتی بس پر میزائل داغا جس سے بس تباہ ہو گئی اور تمام افراد مارے گئے۔
شہدا کی مجموعی تعداد 8 ہزارسے تجاوز کرگئی۔ تین ہزار سے زائد بچے بھی شامل ہیں۔صیہونی فوج نے القدس اسپتال جانے والے راستے بند کردئے۔ القدس اسپتال میں 12 ہزار افراد نے پناہ لے رکھی ہے، اسپتال میں 400 مریض اور سینکڑوں زخمی زیرِ علاج ہیں۔ ہیومن رائٹس واچ کی سابق ایگزیکٹیو ڈائریکٹر نے کہا ہے کہ القدس اسپتال پر بمباری جنگی جرم ہو گا۔ اسرائیلی بمباری سے دیرالبلا کی مسجد بلال بن رباح شہید ہوگئی۔
حماس اور اسرائیلی فوج کے درمیان شمال مغربی غزہ میں شدید لڑائی جاری ہے۔ عزالدین القسام بریگیڈ نے کہا ہے کہ مزاحمت کار قابض افواج کے ساتھ شدید لڑائی لڑ رہے ہیں۔