کرد جنگجوؤں کو ترکیہ سے شمالی عراق منتقل کرنے کا اعلان

استنبول: کردستان ورکرز پارٹی (پی کے کے) نے تمام مسلح جنگجوؤں کو ترکیہ سے شمالی عراق منتقل کرنے کا اعلان کردیا۔ پی کے کے نے ایک بیان میں بتایا کہ ترکیہ سے جنگجوؤں کی واپسی کا عمل شروع ہو چکا ہے۔ ابتدائی طورپر آٹھ خواتین سمیت پچیس جنگجوؤں کا گروپ شمالی عراق کے علاقے قندیل پہنچ چکا ہے۔
نیوزایجنسی انادولو کے مطابق تقریب کے دوران تنظیم کے نمائندوں نے بتایاکہ یہ انخلا ’دہشت گردی سے پاک ترکیہ‘ کے عمل کا حصہ ہے۔ بیان میں ترکیہ سے مطالبہ کیا گیا ہے کہ وہ فوری طور پر قانونی اور سیاسی اقدامات اٹھائے تاکہ کرد اقلیت کے حقوق کی جمہوری بنیادوں پر حفاظت ممکن ہو سکے۔
حکمران جماعت اے کے پارٹی کے ترجمان عمر چیلک نے اس پیش رفت کو اسٹریٹجک اور تاریخی قدم قرار دیا۔ ان کے مطابق یہ عمل ترکیہ میں پائیدار امن کے لیے بنیاد فراہم کرے گا۔