ایشیا پیسفک میں چین کے اثر و رسوخ سے امریکا پریشان، کھلی دھمکیاں

واشنگٹن: ایشیا پیسفک میں بیجنگ کے بڑھتے ہوئے اثر و رسوخ نے امریکا کو پریشان کردیا ۔ امریکی وزیر دفاع لائیڈ آسٹن نے اسے خطرہ قرار دیتے ہوئے کہا ہے کہ چین کی غنڈہ گردی کے خلاف صف آرا ممالک کے ساتھ کھڑے ہیں۔ آسٹریلیا میں اپنے ہم منصب سے دوطرفہ مذاکرات کے آغاز سے قبل امریکی وزیر دفاع لائیڈ آسٹن نے کہا کہ ہم نے بحیرہ مشرقی چین سے لے کر جنوبی بحیرہ چین تک یہاں کے جنوب مغربی بحر الکاہل تک پریشان کن جبر دیکھا ہے۔ انہوں نے کہاکہ ہم اپنے اتحادیوں اور شراکت داروں کی حمایت جاری رکھیں گے کیونکہ وہ چین کے غنڈہ گردی پر مشتمل رویے سے اپنا دفاع کرتے ہیں۔ امریکی الزامات کے بارے میں پوچھے جانے پر چینی وزارت خارجہ کے ترجمان نے کہا تھا کہ بیجنگ “اثر و رسوخ کے لیے کسی بھی ملک سے مقابلہ کرنے میں دلچسپی نہیں رکھتا۔ انہوں نے صحافیوں سے کہا تھا کہ چین اور بحرالکاہل کے جزیرہ نما ممالک کے درمیان تعاون کھلا اور شفاف ہے اور ممالک کی خودمختاری اور مرضی کا مکمل احترام کرتا ہے، ہم کبھی بھی کسی سیاسی معاملے کو جوڑتے ہیں اور نہ ہی کسی تیسرے فریق کو نشانہ بناتے ہیں۔