کراچی میں جماعت اسلامی کا الاقصیٰ ملین مارچ

کراچی: غزہ پر اسرائیلی جارحیت کا ایک سال مکمل ہونے پر اہل فلسطین سے اظہار یکجہتی کےلیے جماعت اسلامی کا کراچی میں الاقصیٰ ملین مارچ ہوا۔ جس میں خواتین اور بچوں سمیت شہریوں کی بہت بڑی تعداد شریک ہوئی۔ امیر جماعت اسلامی پاکستان حافظ نعیم الرحمان نے کہا ہے کہ اسرائیل اور امریکا سب سے بڑے دہشت گرد ہیں۔ امریکا اسرائیل کی پشت پر ہے۔ انہوں نے کہا کہ امریکی صدارتی الیکشن میں امن کے بجائے صیہونیت کو تقویت دینے کی بات ہو رہی ہے، آج دونوں صدارتی امیدوار امن کی بات نہیں جنگ پر الیکشن لڑ رہے ہیں۔ حافظ نعیم الرحمان نے مزید کہا کہ اسرائیل لبنان کو جنگ میں دھکیلنا چاہتا ہے، حماس ایک طاقت ہے جس کو 2006 میں مینڈیٹ ملا تھا لیکن امریکا کو پسند نہیں تھا۔ اُن کا کہنا تھا کہ ان بچوں کو سلام پیش کر رہے جو اسرائیل کے خلاف جدوجہد کر رہے ہیں، اگر کوئی نہیں سن رہا ہے تو یاد رکھو کہ یہ کسی کو نہیں چھوڑے گا۔ امیر جماعت اسلامی نے کہا کہ کوئی ایک بزرگ ایسا نہیں، کوئی بچہ ایسا نہیں ہے جو کہے کہ ہم ہتھیار ڈال رہے ہیں۔ اس موقع پر خالد قدومی نے خطاب میں کہا کہ اسرائیل نے غزہ اور لبنان پر مہلک ہتھیار استعمال کیے۔ 50 ہزار سے زائد مسلمان شہید ہوچکے جبکہ 10 ہزار سے زائد لاپتہ ہیں۔ نثار کھوڑو نے کہا کہ دنیا کو عالمی جنگ سے بچانے کےلیے اسرائیل کو روکنا ضروری ہے۔