2 ماہ میں غزہ میں امداد اور خدمات میں توسیع کی جائے گی، اقوام متحدہ

جنیوا : اقوام متحدہ نے اعلان کیا ہے کہ غزہ میں جنگ بندی کے ابتدائی دو ماہ کے دوران انسانی ہمدردی کی بنیاد پر امداد اور خدمات میں نمایاں توسیع کی جائے گی۔ اس مقصد کے لیے گیارہ ملین ڈالر کی اضافی امداد مختص کی گئی ہے۔
اقوام متحدہ کے ادارے اوچا کے سربراہ ٹام فلیچر نے کہا ہےکہ گیارہ ملین ڈالر کی رقم گزشتہ ہفتے فراہم کیے گئے نو ملین ڈالر کےعلاوہ ہے۔ فلیچر نے خبردار کیا کہ اگر سینٹرل ایمرجنسی ریسپانس فنڈ میں نئی رقوم جمع نہ ہوئیں تو اہم امدادی سرگرمیاں متاثر ہو سکتی ہیں۔ انہوں نے کہا کہ جنگ بندی کے ابتدائی ساٹھ دنوں میں اقوام متحدہ اور اس کے شراکت دار ادارے خوراک، پانی، صحت، رہائش، حفظانِ صحت کی اشیاء، اور حفاظتی مدد سمیت زندگی بچانے والی امداد غزہ کے ہراس علاقے میں پہنچائیں گے جہاں ضرورت ہے۔ انہوں نے کہا کہ اب تک منظوری یافتہ امداد کی مقدار ایک لاکھ نوے ہزار ٹن ہو گئی ہے۔ یہ سامان اردن، مصر، اسرائیل، قبرص اور مغربی کنارے میں موجود ہے اور منتقلی کے لیے تیار ہے۔