امریکا اور عراق کے درمیان فوجیوں کی تعداد میں کمی پر اتفاق

بغداد: امریکا اور عراق نے داعش کے خلاف جنگ کے نام پر عراق میں موجود اتحادی فوجیوں کی تعداد میں کمی پر اتفاق کرلیا۔ عراقی وزارت خارجہ کے مطابق امریکہ کے ساتھ مذاکرات میں اتفاق کیا گیا کہ عراق میں فوجی مشاورت کےلئے موجود اہلکاروں کی تعداد میں بتدریج کمی لائی جائے گی۔ بیان میں مزید کہا گیا ہے کہ عراق اور اتحادی ممالک کے درمیان اچھے تعلقات قائم ہیں۔ فوجوں کی تعداد میں کمی کے لئے بنائی گئی کمیٹی اس حوالے سے موجود رکاوٹوں کو ختم کرنے کے لئے اقدامات کرے گی۔ عراق ان مشیروں کی حفاظت اور سیکیورٹی کے حوالے سے اپنی ذمہ داریوں سے آگاہ اور ان کو پورا کرنے کے لئے مکمل تیار ہے۔ وزارت خارجہ نے کہا ہے کہ عراقی حکومت اس معاہدے کا خیر مقدم کرتی ہے اور عوام کے ساتھ کئے گئے وعدوں کی تکمیل کا حصہ شمار کرتی ہے۔ دوسری جانب امریکی وزیردفاع لائیڈ آسٹن نے کہا ہے کہ امریکہ اور عراق کے درمیان دفاعی سطح کی اعلیٰ کمیٹیوں کا رابطہ ہوگا جس کے نتیجے میں دونوں ملکوں کے درمیان سیکیورٹی کے حوالے سے پائیدار تعلقات قائم ہوں گے۔