Raza Musani 
جنیوا : اقوام متحدہ کے ترقیاتی ادارے یو این ڈی پی نے کہا ہے کہ امریکہ، عرب اور یورپی ممالک سمیت کئی ممالک نے غزہ کے تعمیرنو کے لیے درکار ستر ارب ڈالر کے فنڈز دینے پر ابتدائی رضامندی ظاہر کی ہے۔
برطانوی خبر رساں ادارے رائٹرز کے مطابق یہ بات اقوام متحدہ کے ڈیویلپمنٹ پروگرام (یو این ڈی پی) کے عہدے دار جیکو سیلیئرز نے جنیوا میں پریس کانفرنس میں بتائی۔ جیکو سیلیئرز نے کہا کہ وہ متعدد ممالک کی جانب سے بہت مثبت آوازیں سن چکے ہیں جنہوں نے ممکنہ تعاون کا عندیہ دیا ہے۔ جن میں یورپی ممالک، کینیڈا، اور امریکہ شامل ہیں۔ انہوں نے بتایا کہ اسرائیل اور حماس کی دو برس تک جاری رہنے والی جنگ میں تقریباً ساڑھے پانچ کروڑ ٹن ملبہ جمع ہو چکا ہے۔ اور غزہ کو مکمل طور پر ٹھیک کرنے میں دہائیاں لگ سکتی ہیں ۔ اس سے قبل ترکیہ کے صدر رجب طیب ارودغان نے کہا تھا کہ نئے جنگ بندی معاہدے کے بعد وہ عرب ممالک، امریکہ اور یورپ سے غزہ کی تعمیرنو کے لیے درکار مدد کے لیے رابطہ کریں گے۔
