Raza Musani 
سکھر: صوبۂ سندھ کے شہر روہڑی میں 500 سالہ تاریخی نو ڈھالہ تعزیہ کا جلوس برآمد ہو گیا ہے جو مختلف مقامات پر پڑاؤ کے بعد یوم عاشور کو آخری منزل شہداء قبرستان پہنچ کر اختتام پذیر ہوگا۔ کربلائے معلیٰ کا تعزیہ جلوس شمع گل ہونے کے ساتھ امام بارگاہ شاہِ عراق سے برآمد ہوا۔ جلوس نے روہڑی شہر کی تنگ و تاریخی گلیوں سے ہوتے ہوئے منڈو کھبڑ کے مقام پر پہلا پڑاؤ ڈالا ۔ نمازِ ظہرین تک ضریحِ اقدس نو ڈھالہ تعزیے کی زیارت کا سلسلہ جاری رہے گا۔ نمازِ ظہرین کے بعد جلوس دوسرے مرحلے میں دوسری منزل کے لیے برآمد ہو گا۔ جلوس شام 6 بجے تک میدانِ کربلا پہنچ کر دوسرا پڑاؤ ڈالے گا۔ دس محرم کو نمازِ ظہرین کے بعد جلوس آخری منزل شہداء قبرستان کے لیے روانہ ہو گا۔
