Raza Musani 
تہران: ایران میں صیہونی حکومت کی خفیہ ایجنسی موساد کے چار ایجنٹوں کو سزائے موت دے دی گئی۔ دہشت گردوں کو اصفہان میں بم دھماکے کے بعد پیچیدہ انٹیلی جنس آپریشن کے دوران گرفتار کیا گیا تھا۔ دہشت گرد 23 جولائی 2022 کو نجف آباد شہر میں وزارت دفاع سے منسلک تنصیب کو نشانہ بنانے کی منصوبہ بندی کر رہے تھے۔ جو وزارت دفاع کے لیے فوجی سازوسامان اور میزائل کے پرزے تیار کرتی ہے۔ ایرانی انٹیلی جنس فورسز نے چند دنوں میں ان کی شناخت کر لی اور منصوبے پر عملدرآمد سے پہلے گرفتار کر لیا۔ دہشت گردوں کیخلاف قانونی کارروائی ایک سال تک جاری رہی اور تحقیقات، شواہد اور دستاویزات کے مد نظر، جرائم کے اعتراف اور الزامات کی تشریح مکمل ہونے کے بعد ان کا مقدمہ عدالت میں بھیجا گیا اور عدالت نے مجرموں کے لئے سزائے موت کا حکم جاری کیا۔ آپریشن سے تقریباً ڈیڑھ سال قبل ان افراد کی شناخت کوملہ دہشت گرد گروہ کے ایک سینئر رکن نے کی تھی اور انہیں موساد میں بھرتی کیا گیا تھا اور انہیں کئی مراحل میں تربیت اور ٹریننگ کے لیے افریقی ممالک بھیجا گیا تھا۔
