انگلینڈ: پارک میں چاقو سے حملہ، 3 افراد ہلاک

لندن (نیٹ نیوز) غیر ملکی خبررساں ادارے کے مطابق جنوب مشرقی لندن کی کاؤنٹی برک شائر میں نامعلوم شخص نے ریڈنگ کے ایک پارک میں چاقو سے متعدد حملے کیے جس کے نتیجے میں 3 افراد ہلاک اور متعدد زخمی ہو گئے، زخمیوں کو فوری طور پر ہسپتال منتقل کر دیا گیا ہے جہاں 3 افراد کی حالت تشیوشناک بتائی جا رہی ہے۔ رپورٹس کے مطابق نامعلوم شخص کی جانب سے حملہ اس وقت کیا گیا جب "بلیک لائیوز میٹرز” تحریک کے حوالے سے احتجاج کیا جا رہا تھا تاہم ایک عینی شاہد نے دعویٰ کیا ہے کہ یہ حملہ احتجاج ختم ہونے کے تقریباً 3 گھنٹے بعد کیا گیا ہے۔ برطانوی نشریاتی ادارے کے مطابق پولیس کا کہنا ہے کہ جائے وقوعہ سے 25 سالہ شخص کو گرفتار کیا گیا ہے جس کے بارے میں یہ خیال ہے کہ اس کا تعلق لیبیا سے ہے جب کہ انسدادِ دہشت گردی کے محکمے سے تعلق رکھنے والے افسران اس وقت جائے وقوعہ پر موجود ہیں تاہم حملوں کے مقاصد کے حوالے سے ابھی کچھ نہیں کہا جا سکتا ہے۔ دوسری جانب برطانوی وزیراعظم برس جانسن نے واقعے کی مذمت کرتے ہوئے کہا کہ ان کی ہمدردی حملے میں متاثر ہونے والے افراد کے ساتھ ہیں۔