Raza Musani 
لندن : برطانیہ، فرانس اور جرمنی سمیت بائیس ممالک نے غزہ میں فوری جنگ بندی اور انسانی امداد کی مکمل بحالی کا مطالبہ کیا ہے۔ بائیس ممالک کے وزرائے خارجہ اور یورپی یونین کی خارجہ امور کی سربراہ کاجا کیلس نے مشترکہ بیان میں کہا کہ غزہ کی آبادی کو خوراک، ادویات اور ضروری سامان کی شدید قلت کا سامنا ہے۔ بیان میں امداد کی محدود بحالی کو تسلیم کرتے ہوئے واضح کیا گیاہے کہ اسرائیل نے انسانی امداد کو دو ماہ سے زیادہ عرصے سے روک رکھا ہے۔ بیان میں کہا گیاہے کہ امدادی کارروائیوں کی محدود اجازت کے بجائے بلا روک ٹوک انسانی امداد کو مکمل طور پر بحال کیا جانا چاہیے۔ بیان میں کہا گیا ہے کہ امدادی گروپوں کے پاس غزہ میں انسانی بنیادوں پر کارروائیاں دوبارہ شروع کرنے کی خواہش اور صلاحیت دونوں موجود ہیں۔ وہ امداد کی فراہمی کے لیے نئے ماڈل کی حمایت نہیں کریں گے۔ بیان پر آسٹریلیا، کینیڈا، ڈنمارک، فرانس، جرمنی، اٹلی، جاپان، ہالینڈ، اسپین سمیت بائیس ممالک کے وزرائے خارجہ نے دستخط کئے ہیں۔
