کرگل کشمیر میں بھی فلسطینیوں سے اظہارِ یکجہتی اور غاصب اسرائیل سے اظہارِ برات

امام خمینی (رہ) کے دستور کو جاری رکھتے ہوئے جمعۃ الوداع کو عالم اسلام کے ساتھ ساتھ مقبوضہ کشمیر کے ضلع کرگل میں بھی عالمی یوم القدس کے عنوان سے منایا گیا۔ امام خمینی میموریل ٹرسٹ کرگل کے زیر اہتمام نماز جمعہ کے بعد مومنین مرکزی جامع مسجد کرگل کے پاس جمع ہوئے جہاں سے بسیج امام آئی کے ایم ٹی کے زیر نگرانی کوویڈ ایس او پیز کا لحاظ رکھتے ہوئے قدس ریلی نکالی گئی۔ اس دوران مظاہرین مسلمانوں کے قبلہ اول مسجد اقصیٰ کا ایک دلکش ماڈل بھی اٹھائے ہوئے تھے جس نے ریلی کی رونق دو بالا کر رکھی تھی۔ لوگ ہاتھوں میں مظلوم و مقبوضہ فلسطین کے پرچم اور غزہ کے مظلوموں کے حق میں نعرے بلند کررہے تھے اور ہاتھوں میں بینرز، پرچم اور پلے کارڈز لئے ہوئے تھے۔
مظاہرین حسینی پارک پہونچے جہاں پر بسیج امام کے جوانوں نے پہلے سے جلسہ کیلئے سماجی دوری کا لحاظ رکھتے ہوئے بیٹھنے کا انتظام کر رکھا تھا اور حسینی پارک کو فلسطینی پرچم سے سجا رکھا تھا۔ اس دوران الحاج اصغر علی کربلائی نے جلسہ سے خطاب کرتے ہوئے کہا کہ یوم القدس نہ صرف فلسطین کا بلکہ بقول امام راحل (رہ) اسلام کا دن ہے کیونکہ قبل اول کا مسئلہ صرف ایک خاص خطہ یا ملک کا مسئلہ نہیں بلکہ پوری انسانیت کا مسئلہ ہے۔