عراق کی عوامی رضاکار فورس نے صوبہ دیالہ اور صلاح الدین کے سرحدی علاقے میں داعش کی ایک خفیہ سرنگ کا پتہ لگالیا۔ عوامی رضاکار فورس الحشدالشعبی کے کمانڈر احمد التمیمی نے بتایا ہے کہ صوبہ دیالہ اور صلاح الدین کے درمیانی علاقے حاوی العظیم میں سیکیورٹی فورس کے مشترکہ سرچ آپریشن کے دوران داعشی دہشت گردوں کی ایک خفیہ سرنگ کا پتہ لگایا گیا۔
انہوں نے بتایا کہ داعشی دہشت اس سرنگ کو دھماکہ خیز مواد اور ہتھیاروں کو اسٹور کرنے کے لیے استعمال کرتے تھے۔
الحشد الشعبی کے کمانڈر نے مزید کہا کہ داعش کی اس خفیہ سرنگ سے تیرہ بم، درجنوں ڈیٹونیٹر، دھماکہ خیز مواد اور مختلف طرح کی بندوقیں برآمد ہوئی ہیں۔
واضح رہے کہ عراق میں داعش کی شکست اور اس کی نام نہاد خلافت کے خاتمے کے باوجود اس دہشت گرد گروہ کے خفیہ جتھے صوبہ دیالہ، کرکوک، نینوا، صلاح الدین اور الانبار میں روپوش ہیں اور گاہے بگاہے عراقی شہریوں اور سیکیورٹی دستوں کو نشانہ بناتے رہتے ہیں۔
