ایگزیکٹو ڈائریکٹر اسلام آباد پالیسی ریسرچ انسٹیٹیوٹ حسین ندیم کا کہنا ہے کہ بھارت پاکستان میں جعلی آئی ڈیز سے فرقہ وارانہ فسادات پھیلانے کی کوشش کر رہا ہے، آئی پیز چیک کرنےکے بعد معلوم ہوا کہ آئی ڈیز بھارت سے رجسٹرڈ ہوتی ہیں۔ ریسرچ انسٹیٹیوٹ کے مطابق بھارت کی طرف سے سوشل میڈیا پر پاک فوج، کشمیر اور سی پیک کو نشانہ بنایا جا رہا ہے جبکہ بھارتی پراپیگنڈے کا اہم ہدف چیئرمین سی پیک اتھارٹی عاصم سلیم باجوہ ہیں اور اس پراپیگنڈے کا مقصد سی پیک منصوبے کو سبوتاژ کرنا ہے۔
اسلام آباد پالیسی ریسرچ انسٹیٹیوٹ کے مطابق بھارت پاکستان کے خلاف پراپیگنڈے میں سال 2018 کے عام انتخابات کے بعد ڈیجیٹل میڈیا پر سرگرم ہے۔
ایگزیکٹو ڈائریکٹر اسلام آباد پالیسی ریسرچ انسٹیٹیوٹ حسین ندیم کے مطابق بھارت وزیر اعظم عمران خان کے خلاف بھی پراپیگنڈہ کر رہا ہے اور پاکستان کے حالات بڑھا چڑھا کر پیش کیے جا رہے ہیں۔ یاد رہے کہ گزشتہ روز بھارتی میڈیا نے کراچی میں عمارت میں ہونے والے گیس دھماکے کی خبروں کو اداروں کے درمیان بڑی لڑائی قرار دیا تھا۔
