گلگت بلتستان میں 60 سال سے زائد عمر کے افراد کیلئے کورونا ویکسین لازمی قرار دیدی گئی۔ وزیر اعلیٰ جی بی خالد خورشید کی زیر صدارت کورونا سے بچاؤ اور ایس او پیز پر عملدرآمد کے حوالے سے اعلیٰ سطح کا اجلاس ہوا۔ اجلاس سے خطاب کرتے ہوئے خالد خورشید نے کہا کہ کورونا وائرس سے بچاؤ کیلئے ایس او پیز پر سختی سے عملدرآمد یقینی بنایا جائے، کورونا کے ٹیسٹ بڑھائے جائیں اور تمام ڈپٹی کمشنرز کو ہدایت دی جائے کہ متعلقہ اضلاع میں ساٹھ سال سے زائد عمر کے افراد کیلئے کورونا ویکسین لازمی لگوائی جائے۔ وزیر اعلیٰ نے مزید کہا کہ صوبے کے داخلی راستوں میں کورونا اسکریننگ سنٹرز فعال کیے جائیں اور تمام تقریبات میں کورونا ایس او پیز پر عملدرآمد لازمی کرایا جائے۔ جن علاقوں میں کورونا کیسز سامنے آئے ہیں وہاں اسمارٹ لاک ڈائون کیا جائے۔ خالد خورشید کا مزید کہنا تھا کہ جی بی میں اٹھارہ سال سے زائد عمر کے تمام افراد کیلئے ویکسین کیلئے اسینکیانگ حکومت سے رابطہ کیا جائے گا اور کورونا ویکسین کی دستیابی کی صورت میں صوبائی حکومت اضافی ویکسین خریدے گی۔
