امریکی اکنامک ایڈوائزری کونسل کےسابق سربراہ نے پاکستان کی کورونا کےخلاف حکمت عملی کی شاندار انداز میں تعریف کرتے ہوئے اپنے بیان میں کہا کہ امریکا پاکستان کی طرح اقدامات کرتا تو 10 ٹریلین ڈالرزکی بچت ہوسکتی تھی۔
یاد رہے کہ عالمی بینک کے سابقہ سربراہان نے پاکستان کےکورونا اقدامات کوزبردست قرار دیا جبکہ عالمی ادارۂ صحت (ڈبلیو ایچ او)، ورلڈ اکنامک فورم بھی حکومتی اقدامات کی تعریف کرچکے ہیں۔
ورلڈاکنامک فورم کی جانب سے جاری ہونے والے بیان میں کہا گیا تھا کہ ’کورونا کے خلاف جنگ میں دنیا کو پاکستان سے سیکھنا چاہیے‘۔
واضح رہے کہ چند روز قبل بھارت میں اپوزیشن کی سب سے بڑی جماعت کے سربراہ راہول گاندھی نے سماجی رابطے کی ویب سائٹ پر شرح نمو کے حوالے سے انڈیکس شیئر کرتے ہوئے بھارت کی حکمراں جماعت بھارتیہ جنتا پارٹی (بی جے پی) پر شدید تنقید کی تھی۔ راہول گاندھی نے اپنی حکومت پر تنقید کرتے ہوئے اس بات کا اعتراف بھی کیا کہ کورونا بحران کے دوران حکومت پاکستان نے بھارت سے بہت زیادہ بہتر اقدامات کیے۔
مائیکرو سافٹ کے بانی اور سماجی رہنما بل گیٹس نے بھی عمران خان کے اقدامات کی تعریف کی اور مائیکرو لاک ڈاؤن کو کامیاب قرار دیتے ہوئے دیگر ممالک سے اسے اپنانے کا مشورہ دیا تھا۔
