ملک بھر سے لاپتہ شیعہ افراد کی بازیابی کے لیے کراچی سے شروع ہونے والے جوائنٹ ایکشن کمیٹی فار شیعہ مسنگ پرسنز کے احتجاجی دھرنے کی حمایت میں دیگر شہروں میں بھی علامتی احتجاجی دھرنے دئے گئے۔
ملتان کے نواں شہر چوک میں دیے گئے علامتی احتجاجی دھرنے میں خواتین اور بچوں کی بھی بڑی تعداد نے شرکت کی۔ احتجاجی دھرنے میں آئی ایس او پاکستان کے مرکزی صدر عارف حسین الجانی نے خصوصی شرکت کی۔ دھرنے سے خطاب کرتے ہوئے مقررین نے کہا کہ جب تک ہمارے نوجوانوں کو سامنے نہیں لایا جاتا، تب تک ہمارا احتجاج جاری رہے گا۔ یہ ہمارا آئینی و قانونی مطالبہ ہے، ہم اپنے اصولی موقف سے ایک انچ بھی پیچھے نہیں ہٹیں گے۔
اگر عدالتی نظام پر مقتدر اداروں کو اعتماد ہے تو وہ خفیہ عقوبت خانوں میں رکھے گئے نوجوانوں کو عدالتوں کے سامنے پیش کریں۔ انہوں نے کہا کہ حب الوطنی ہمارے رگ و جاں میں بسی ہوئی ہے، ہمارے اجتماعات میں آج بھی پاکستان سے محبت کا اظہار حب الوطنی سے بھرپور نعروں کے ذریعے کیا جاتا ہے۔ دھرنے سے آئی ایس او پاکستان کے مرکزی صدر عارف حسین الجانی، ایم ڈبلیو ایم جنوبی پنجاب کے سیکریٹری جنرل علامہ اقتدار حسین نقوی، علامہ قاضی نادر حسین علوی، النور اسلامک سینٹر و ٹرسٹ کے سربراہ مولانا وسیم عباس معصومی، مولانا اعجاز حسین بہشتی، مولانا کاشف حیدری، انجینئر سخاوت علی، دلاور عباس زیدی، سید وسیم عباس زیدی، باقر بلوچ، مہر عباس، شہریار حیدر، حسنین انصاری،مولانا فرمان روحانی، امیر گیلانی اور دیگر نے خطاب کیا۔
یاد رہے کہ جوائنٹ ایکشن کمیٹی فار شیعہ مسنگ پرسنز کی کال پر کراچی میں نمائش چورنگی پر قائد اعظم محمد علی جناح(رح) کے مزار کے سامنے جمعہ سے دھرنا جاری ہے۔
