چینی شہریوں کی سیکیورٹی سی پیک کو آگے بڑھانے میں سب سے بڑی رکاوٹ ہے، چینی سفیر

اسلام آباد: چین نے بھی پاکستان میں دہشت گردوں کے خلاف کارروائی کا عندیہ دے دیا۔ اسلام آباد میں پاک چائنہ انسٹیٹیوٹ کے زیراہتمام سیمینار سے خطاب میں چین کے سفیر جیانگ زائی ڈونگ نے کہا ہے کہ چینی شہریوں کی سیکیورٹی سی پیک کو آگے بڑھانے میں سب سے بڑی رکاوٹ ہے۔ اس کے بغیر یہ نہیں چل سکتا، چھ ماہ میں دو مہلک حملے ناقابل قبول ہیں۔ امید ہے کہ پاکستان چینی شہریوں ،اداروں اور منصوبوں کی سیکیورٹی کو مضبوط بنائے گا۔ چینی سفیر نے کہا کہ پاکستان کو ان لوگوں کو سخت سزا دینی چاہیے جو چینی شہریوں پر مہلک حملوں میں ملوث ہیں۔ ۔چینی سفیر کا کہنا تھا کہ ان کے صدر ژی جن پنگ اپنے شہریوں کی سلامتی کے بارے میں بہت فکرمند ہیں، وہ اپنے لوگوں کی زندگیوں کو باقی ہر چیز پر فوقیت دیتے ہیں۔ جب کبھی بھی ان کی پاکستانی قیادت سے ملاقات ہوئی ہے تو انہوں نے پاکستان میں موجود چینی شہریوں ،اداروں اور پراجیکٹس کی سکیورٹی کے بارے میں بات کی ہے۔