پہلا کام گلگت بلتستان کی عبوری صوبائی حیثیت پر کیا جائیگا(عمران خان)

امید ہے منتخب حکومت نئی روایت قائم کرے گی، کمیٹی بنائیں گے جو ٹائم لائن پر کام کرے گی،صوبہ میں اب تک احساس محرومی رہی ہے وہ ختم ہو جائے گی
احساس پروگرام ، ہیلتھ کارڈ اور ہیلتھ انشورنس لائیں گے،سیاحت کو ترقی دے کر علاقے میں انقلابی تبدیلی لائیں گے، کابینہ کی حلف برداری کے بعد خطاب
گلگت (نیوز ڈیسک) وزیر اعظم عمران خان نے کہا ہے کہ گلگت بلتستان کے خطے میں بے پناہ صلاحیت موجود ہے اور یہاں احساس محرومی کو دور کرنے کیلئے ہم عبوری صوبائی حیثیت پر کام کریں گے ،گلگت بلتستان میں کابینہ کی تقریب حلف برداری کے بعد خطاب کرتے ہوئے وزیراعظم نے گلگت بلتستان کی کابینہ اور وزیراعلیٰ کو مبارک باد دی اور کہا کہ مجھے امید ہے کہ یہاں کی منتخب حکومت ایک نئی روایت قائم کرے گی ، میں اس علاقے کو جانتا ہوں اور اب ہم اسے جس رخ پر ڈالیں گے، اس سے یہاں کے عوام کی زندگی بدل جائے گی ، ہم سب سے پہلے عبوری صوبائی حیثیت پر کام کریں گے تاکہ جو اب تک احساس محرومی رہی ہے وہ ختم ہو جائے، ایک کمیٹی بنائیں گے جو ایک ٹائم لائن پر کام کرے گی،عمران خان نے کہاکہ ہم یہاں بھی احساس پروگرام لا رہے ہیں ، ہم سارے گلگت بلتستان کے لوگوں کے لیے ہیلتھ کارڈ اور ہیلتھ انشورنس لے کر آ رہے ہیں ، ان کا کہنا تھا کہ میں اس علاقے میں سیاحت کے شعبے میں موجود صلاحیت کو جانتا ہوں ، یہ سب میرا دیکھا ہوا اور اس پر ہماری پوری توجہ ہو گی، گرمیوں میں تو یہاں انقلاب آ چکا ہے اور سیاحوں کے ٹھہرنے کی جگہ نہیں ہوتی، سارے ہوٹل اور گیسٹ ہاوَسز بھر جاتے ہیں ، ہم سستے قرض دیں گے تاکہ لوگ اپنے گھروں کے ساتھ گیسٹ روم بنا سکیں اور ان کی آمدنی بڑھ سکے ،ان کا کہنا تھا کہ ہم نے اسکردو کا 250 بستروں کا اسپتال شروع کیا ہوا ہے اور وہ جلد شروع ہو جائے گا، یہاں ہسپتال نہیں ہے جس کی وجہ سے لوگوں کو بہت مشکلات کا سامنا کرنا پڑتاہے اور اسلام آباد جانا پڑتا ہے ہم نے فیصلہ کیا ہے کہ اگر ہم 300میگا واٹ بجلی بنائیں تو سارے گلگت بلتستان کے لیے ضرورت سے زیادہ بجلی ہو جائے گی جس کے لیے دو پائیڈرو ایکٹرک پاور اسٹیشن بن رہے ہیں ، دو کی تیاری ہو رہی ہے اور دو کی ہم نے منظوری دے دی ہے، اس طرح 6 اسٹیشنز بن جائیں گے۔