جرمنی میں پولینڈ کے اسٹارلنک سیٹلائٹ اسٹیشن کو آگ لگانے کے شبہہ میں دو ترک شہری گرفتار

برلن: جرمنی میں پولینڈ کے اسٹارلنک سیٹلائٹ کمیونیکیشن اسٹیشن کو آگ لگانے کے شبہے میں دو ترک شہریوں کو گرفتار کر لیا گیا ہے۔
اے ایف پی کے مطابق پولینڈ کے وزیراعظم ڈونلڈ ٹسک نے گرفتاریوں کی تصدیق کرتے ہوئے واقعے کو ہائبرڈ وارفیئر‘ یعنی روایتی جنگ کے علاوہ خفیہ اور تخریبی کارروائیوں کا حصہ قرار دیا ہے۔ پولینڈ کے وزیرِ داخلہ مارسن کیئرونسکی کے مطابق دونوں مشتبہ افراد کو تخریب کاری اور غیر ملکی انٹیلی جنس سروس کی جانب سے جاسوسی کے الزامات کا سامنا ہے۔
حکام کا کہنا ہے کہ گرفتاریاں پولینڈ اور جرمنی کی سکیورٹی ایجنسیوں کے مشترکہ تعاون سے عمل میں آئیں۔
وسطی پولینڈ کے علاقے مازوویا میں واقع یہ اسٹیشن سرکاری ٹیلی کمیونیکیشن کمپنی ایکساٹیل کی ملکیت ہے اور پولینڈ سمیت یوکرین کی جانب انٹرنیٹ ٹریفک کی ترسیل میں بھی استعمال ہوتا ہے۔ ستمبر کے آخری حصے میں پیش آنے والے واقعے کے باوجود اسٹیشن فعال رہا تھا، پولینڈ نے اس واقعے کو یوکرین کی فوج سمیت مختلف اداروں کی انٹرنیٹ رسائی متاثر کرنے کی ممکنہ کوشش قرار دیا ہے۔ تاہم اس تخریبی کارروائی کے پیچھے کسی غیر ملکی ریاست کے ملوث ہونے کی حتمی تصدیق سامنے نہیں آئی۔