اسلام آباد میں تعیینات فلسطین کے سفیرنے متحدہ عرب امارات اور اسرائیل کے مابین معاہدے کے متعلق پاکستانی موقف کی تعریف کرتے ہوئے کہا ہے کہ پاکستانی حکومت اور عوام کے شکرگزار ہیں۔ سفیر کا کہنا ہے کہ حالیہ تناظر میں پاکستان کے وزیر اعظم عمران خان کے موقف کی دل سے تعریف کرتے ہیں۔ یہ فلسطین کے ساتھ پاکستانیوں کی محبت ہے کہ اسرائیلی اور پاکستان تعلقات کبھی قائم نہیں ہوئے۔
پاکستان میں تعینات فلسطین کے سفیر احمد جواد ربیعی نے کہا کہ پاکستان کی جانب سے فلسطین کی حمایت اور اسرائیلی جارحیت کے خلاف موقف پر عوام اور حکومت کا شکریہ اداکرتے ہیں۔
فلسطینی سفیر احمد جواد ربیعی نے کہا کہ پاکستان نے ہمیشہ دنیا کے ہر فورم پر فلسطین کی حمایت کی ہے۔
انہوں نے کہا کہ ہم سیاسی جماعتوں، میڈیا، سول سوسائٹی سمیت پاکستان کے ہر فرد کے شکر گزار ہیں۔
خیال رہے کہ گزشتہ دنوں ایک نجی ٹی وی چینل کو انٹرویو دیتے ہوئے وزیراعظم عمران خان نے کہا تھا کہ پاکستان اسرائیل کو اس وقت تک تسلیم نہیں کرے گا جب تک وہ فلسطینیوں کے حق خودارادیت اور الگ ریاست کو تسلم نہیں کرتا۔
نجی ٹی وی چینل کو دیئے گئے ایک انٹرویو میں انھوں نے کہا تھا کہ قائداعظم نے کہا تھا فلسطینیوں کو حق ملے تو اسرائیل کو تسلیم کریں گے، اسرائیل کے بارے میں پاکستان کا مؤقف واضح ہے۔
وزیراعظم کا کہنا تھا کہ فلسطین کے بارے میں ہمیں اللہ کو جواب دینا ہے۔ دوسرے ممالک جو بھی کریں ہمارے مؤقف بالکل واضح ہے۔ پاکستان اسرائیل کو اس وقت تک تسلیم نہیں کرے گا جب فلسطین کا فیصلہ فلسطینیوں کی مرضی کے مطابق نہیں ہوتا۔ ان کی انصاف کے مطابق آبادکاری نہیں ہوتی۔
