Raza Musani 
لاہور: شیعہ علماء کونسل شمالی پنجاب کے صدر علامہ سید سبطین حیدر سبزواری نے کہا ہے کہ ملت جعفریہ نے ایک بار پھر ثابت کر دیا ہے کہ وہ عزاداری سید الشہداء پر کوئی سمجھوتہ کرنے کو تیار نہیں، دشمنان اہلبیت(ع) کے تمام منصوبے ناکام ہوگئے، سوائے چند مقامات کے جہاں بھی مجالس اور جلوسوں میں رکاوٹیں ڈالی گئی پنجاب پولیس میں موجود تکفیری عناصر نے ہی اپنی اصلیت دکھائی، مگر انہیں منہ کی کھانا پڑی اور انشاء اللہ آئندہ بھی کوئی یزیدی عزاداری کو نہیں روک سکے گا، لاہور میں صوبائی کابینہ کے اجلاس سے خطاب میں علامہ سبطین سبزواری نے کہا کہ عزاداری ہماری طاقت اور اتحاد کا محور ہے، ہم کسی حکومت یا مسلک کیخلاف نہیں، ماتمی جلوسوں اور مجالس کی ہر سال بڑھتی تعداد نے واضح کر دیا ہے کہ ذکر حسینؑ کو روکنا کسی کے بس کی بات نہیں، ایک بھی شیعہ زندہ رہا تو جلوس نکلیں گے اور مجالس بھی ہوں گی، اس لیے پولیس اور انتظامیہ سے اپیل ہے کہ وہ عوام کو تحفظ فراہم کرنے میں اپنی توانائیاں استعمال کریں، عزاداری کو روکنے کی منفی روش ترک کرکے عوام کی خدمت کریں۔
