Raza Musani 
جنیوا: مغربی ممالک نے عالمی ایجنسی برائے جوہری توانائی ( آئی اے ای اے) میں ایران کے خلاف قرارداد پیش کردی۔ ایران نے بھی جوابی حکمت عملی تیار کرلی۔
آئی اے ای اے کے بورڈ آف گورنرز میں پیش کی گئی امریکا، فرانس، جرمنی اور برطانیہ کی قرارداد میں ایران کی جوہری عدم پھیلاؤ کے معاہدے این پی ٹی کی مبینہ خلاف ورزیوں کی مذمت کی گئی ہے اور ایران سے مطالبہ کیا گیا ہے کہ وہ فوری طور پر اپنی ذمہ داریوں کی انجام دہی کے لیے اقدامات کرے۔ قرارداد میں کہا گیا ہے کہ ایران نے عالمی ایجنسی کی مسلسل اپیلوں اور دیے گئے مواقع کے باوجود مکمل تعاون نہیں کیا۔
ایرانی وزارت خارجہ کے ترجمان اسماعیل بقائی نے کہا کہ ایران نے قرارداد کے جواب میں کئی آپشنز تیار کرلئے ہیں۔ یہ آپشنز ایران کی جوہری توانائی تنظیم کے تعاون سے تیار کئے گئے ہیں۔ انہوں نے کہا کہ آئی اے ای اے کے سربراہ رافیل گروسی کی رپورٹ امریکا اور اس کے یورپی اتحادیوں کے ایجنڈوں کو پورا کرنے کے سیاسی مقاصد کے طور پر پیش کی گئی ہے۔
