اسرائیل کی امریکی حمایت جنگ بندی میں رکاوٹ ہے، ایران

تہران: ایرانی وزیرخارجہ عباس عراقچی نے کہا ہے کہ غزہ میں بیان کردہ انسانی حالات ناقابل یقین ہیں۔جنگ بندی میں سب سے بڑی رکاوٹ امریکہ اور مغربی ممالک کی طرف سے اسرائیل کو فراہم کردہ حمایت ہے۔ نیویارک میں ایرانی وزیر خارجہ نے کویت، بحرین اور کیوبا کے وزرائے خارجہ اور خلیج فارس تعاون کونسل کے سیکرٹری جنرل سے ملاقات کی۔ اس موقع پر انہوں نے کہا کہ اسرائیلی حکومت کی عالمی قوانین کی خلاف ورزیوں اور جان لیوا جارحیت سے خطے اور دنیا کے امن و سلامتی کو شدید خطرات لاحق ہیں۔ انہوں نے کہا کہ خطے کے ممالک کو اسرائیلی حکومت کے مذموم اقدامات کو ناکام بنانے کے لیے ایک دوسرے کے ساتھ تعاون کرنا چاہیے۔ انہوں نےکہا کہ بدتر بات یہ ہے کہ انسانی ہمدردی کی بنیاد پر امداد فراہم کرنے کے تمام راستے بند ہیں اور انہیں داخل ہونے اور امداد تقسیم کرنے کی اجازت نہیں ہے۔ انہوں نے کہا کہ صیہونی حکومت کو بعض ممالک بالخصوص امریکہ کی حمایت حاصل ہے اور جنگ بندی کے قیام اور اس جنگ کو روکنے میں سب سے بڑی رکاوٹ امریکہ اور مغربی ممالک کی طرف سے فراہم کردہ حمایت ہے۔