Raza Musani 
تہران: ایرانی پاسدارانِ انقلاب کے ترجمان حسین محبی نے کہا ہے کہ امریکا کے پاس نئی کارروائیاں کرنے کی فنی اور عسکری صلاحیت نہیں، تاہم وہ شاید کچھ کامیابیاں حاصل کرنے کی کوشش کر سکتا ہے۔ حسین محبی نے کہا کہ امریکا یقیناً اس پوزیشن میں نہیں ہے کہ کوئی نیا تنازع شروع کرے جس سے اسے نئی کامیابیاں حاصل ہوں۔ خطے میں موجود امریکی اڈوں کا بیشتر حصہ غیر فعال کر دیا گیا ہے اور یہ کہ ان کی افواج، تھکاوٹ کا شکار ہونے کے علاوہ ایران سے سینکڑوں کلومیٹر دور منتقل ہو چکی ہیں۔انھوں نے کہا کہ امریکی بحری جہاز بھی خلیج فارس سے 700 کلومیٹر سے زیادہ فاصلے پر موجود ہیں۔ تاہم حسین محبی نے فوجی حملے کے امکان کو مسترد نہیں کیا اور کہا کہ امریکا کے پاس نئی کارروائیاں انجام دینے کی فنی اور عسکری صلاحیت نہیں، لیکن یہ ممکن ہے کہ چونکہ امریکی انتخابات قریب آرہے ہیں، اس لیے وہ کچھ کامیابیاں حاصل کرنا چاہے۔
پاسدارانِ انقلاب کے ترجمان نے کہا کہ ہم ان امکانات کو نظرانداز نہیں کرتے اور کسی بھی اقدام کا جواب دینے کے لیے تیار ہیں، اور اس بار ہمارا جواب کہیں زیادہ سخت ہو گا۔انھوں نے خبردار کیاکہ امریکہ کی کسی بھی نئی کارروائی، خواہ وہ محدود ہی کیوں نہ ہو، کے نتیجے میں دنیا کو توانائی کے ایک سنگین بحران کا سامنا کرنا پڑے گا۔
