امریکی محکمہ خارجہ کی غیر ملکی انتخابات میں دھاندلی پر تنقید پر پابندی

واشنگٹن : امریکا میں ٹرمپ انتظامیہ نے محکمہ خارجہ کی جانب سے غیر شفاف غیر ملکی انتخابات میں دھاندلی اور بدعنوانی پر تنقید پر پابندی لگادی۔ امریکی وزیرخارجہ مارکو روبیو نے دنیا بھر میں امریکی سفارتی اور قونصلر دفاتر کو میمو بھیجا ہے جس میں ہدایت کی گئی ہے کہ سفارتی اور قونصلر دفاتر اپنے پیغامات میں انتخابی عمل کی شفافیت، دیانتداری، اس کی قانونی حیثیت یا متعلقہ ملک کی جمہوری اقدار پر رائے دینے سے گریز کریں۔ میمو میں کہا گیاہے کہ غیر ملکی انتخابات پر بیانات مختصر ہونے چاہئیں، جیتنے والے امیدوار کو مبارکباد دینے اور جہاں مناسب ہو وہاں مشترکہ خارجہ پالیسی مفادات کی نشاندہی تک محدود رہنے چاہئیں۔ مارکو روبیو کا کہنا تھا کہ انتخابات سے متعلق پیغامات کو کسی نظریے کے فروغ کے بجائے، امریکی خارجہ پالیسی کے مقاصد کے فروغ کے لیے استعمال کیا جائے۔ یہ ہدایات محکمہ خارجہ کے ملکی دفاتر اور بیرونی مشنز دونوں پر لاگو ہو گی۔