امریکی ہٹ دھرمی، غزہ میں جنگ بندی کی ایک اور قرارداد ویٹو کردی

نیویارک: امریکا نے ایک بار پھر ہٹ دھرمی کا مظاہرہ کرتے ہوئے سلامتی کونسل میں غزہ میں جنگ بندی کی قرارداد ویٹو کردی۔ متحدہ عرب امارات نے اسلامی ممالک کی جانب انسانی بنیادوں پر جنگ بندی کی قرارداد پیش کی تھی۔قرارداد پر ووٹنگ کے دوران چین اور روس سمیت 13 ممالک نے حمایت کی جبکہ برطانیہ غیرحاضر رہا۔امریکا نے سلامتی کونسل میں دوسری بار جنگ بندی کی قرارداد کو ویٹو کیا ہے۔ قرارداد کے مسودے میں غزہ میں انسانی بنیادوں پر فوری جنگ بندی اور تمام مغویوں کی فوری اور غیر مشروط رہائی سمیت انسانی امداد کی رسائی کو یقینی بنانے کا مطالبہ کیا گیا تھا۔ قرارداد میں غزہ میں تباہ کن انسانی صورتحال اور فلسطینی شہریوں کے مصائب پر شدید تشویش کا اظہار اور اس بات پر زور دیا گیا تھا کہ فلسطینی اور اسرائیلی شہری آبادی کو بین الاقوامی انسانی قانون کے مطابق تحفظ فراہم کیا جانا چاہیے۔