امریکی و روسی صدور کی ملاقات، یوکرین جنگ بندی پر اتفاق نہ ہوسکا

الاسکا: امریکی صدر ڈونلڈ ٹرمپ اور روسی صدر ولادیمیر پیوٹن کی اہم ملاقات میں یوکرین کے معاملے پر کوئی پیش رفت نہ ہوسکی۔ الاسکا کے فوجی ایئربیس پر دونوں صدور کی ملاقات چار گھنٹے تک جاری رہی۔ ملاقات کے بعد مشترکہ نیوز کانفرنس میں دونوں رہنماؤں نے بات چیت کو انتہائی تعمیری قرار دیا۔ پیوٹن نے کہا کہ دیرپا امن کے لیے تنازعہ کی بنیادی وجوہات کا خاتمہ ناگزیر ہے اور روس اس مقصد کے لیے کام کرنے پر تیار ہے۔ پیوٹن نے صدر ٹرمپ کو ماسکو میں اگلی ملاقات کی دعوت دی جسے ٹرمپ نے قبول کرلیا۔
ٹرمپ نے کہا کہ ہم ابھی معاہدے تک نہیں پہنچے، لیکن ہم نے پیش رفت کی ہے، جب تک مکمل معاہدہ نہ ہو، کوئی معاہدہ نہیں ہوتا۔ انہوں نے کہا کہ کئی نکات پر اتفاق ہو گیا ہے، لیکن کوئی تفصیل نہیں بتائی۔