غزہ میں ناقابل بیان تباہی، صورتحال ناقابل برداشت

جنیوا: اقوام متحدہ نے غزہ میں تباہی کو ناقابل مثال قرار دے دیا۔ ریڈ کراس نے کہاہے کہ صورتحال ناقابل برداشت ہے۔
اقوام متحدہ کے ادارے انروا نے کہاہےکہ غزہ میں 60 فیصد سے زیادہ انفراسٹرکچر تباہ ہوچکاہے یا اسے نقصان پہنچا ہے۔ نوے فیصد سے زیادہ آبادی بے گھر ہو چکی ہے۔ ادارے کے بیان میں کہاگیاہے کہ یہ تباہی اور زبردستی نقل مکانی کی ایک حیران کن اور بے مثال سطح ہے، جو ہماری آنکھوں کے سامنے ہو رہی ہے۔
ادھر ریڈ کراس کے سربراہ میرجانا اسپولجارک نے کہاہے کہ انہوں نے بمباری والے علاقے کے حالیہ دورے کے دوران غزہ میں ہر چیز کی کمی دیکھی۔ انسانی ہمدردی کے کام کرنے والوں کے لیے آپریشنل جگہ کی کمی ہے۔ لیکن سب سے اہم بات یہ ہے کہ غزہ میں لوگوں کے لئےتحفظ کا شدید فقدان ہے۔ کچھ امداد پہنچ رہی ہے۔ کچھ ٹرک آرہے ہیں لیکن لوگوں کی تکالیف اور ضروریات کی سطح کو دیکھتے ہوئے یہ کافی نہیں ہے۔