یوکرین کا خارکیف پر روس کے میزائل حملے میں 51 شہریوں کی ہلاکت کا دعویٰ

کیف: یوکرین نے خارکیف پر روس کے میزائل حملے میں 51 شہریوں کی ہلاکت کا دعویٰ کردیا۔ یوکرینی حکام کا کہنا ہے کہ خارکیف کے علاقے ہروزا میں روس نے کیفے اور سپر مارکیٹ کو نشانہ بنایا وزیرداخلہ نے دعویٰ کیا کہ روس نے حملے کیلئے اسکندر میزائل کا استعمال کیا۔ حملے کے وقت لوگوں کی بڑی تعداد کیفے میں ایک تعزیتی تقریب میں شریک تھی۔ مرنے والوں میں ایک چھ سالہ بچہ بھی شامل ہے۔ کئی افراد زخمی بھی ہوئے ۔وزیرداخلہ نے کہا کہ 330 افراد پر مشتمل گاؤں کا ہر خاندان حملے میں متاثر ہوا ہے۔ روسی حکام نے کسی بھی شہری ہدف کو نشانہ بنانے کی تردید کی ہے۔ وائٹ ہاؤس کی پریس سیکریٹری کرائن جین پیئر نے کہا ہے کہ روسی میزائل حملہ یوکرین کے لوگوں کے لیے ناقابل یقین حد تک خوفناک ہے۔ امریکا یوکرین کی مدد کے لیے ہر ممکن کوشش کر رہا ہے۔