ٹی ٹی پی کو پاکستان میں حملوں کیلئے القاعدہ کی سرپرستی حاصل

نیویارک: افغانستان میں موجود کالعدم تحریک طالبان پاکستان ٹی ٹی پی کو پاکستان میں حملوں کےلیے القاعدہ کی سرپرستی مل گئی۔ دہشت گرد سرگرمیوں کی نگراں اقوام متحدہ کی کمیٹی نے سلامتی کونسل میں رپورٹ پیش کردی۔ رپورٹ کے مطابق ٹی ٹی پی القاعدہ کے ساتھ الحاق کی کوشش کر سکتی ہے تاکہ وہ ایک ایسی تنظیم تشکیل دے جو جنوبی ایشیا میں سرگرم تمام عسکریت پسند گروہوں کی سرپرستی کرسکے۔ رپورٹ میں پاکستان کی اس شکایت کی تائید کی گئی ہے کہ کالعدم ٹی ٹی پی نے افغان طالبان کے برسراقتدار ہونے کے بعد سے افغانستان میں اپنا اثر و رسوخ بڑھایا ہے۔ اور اس نے افغان صوبے کنڑ میں دیگر دہشت گرد گروہوں کے تربیتی کیمپوں کا استعمال شروع کردیا ہے۔ رپورٹ میں کہا گیا کہ کئی منقسم گروہوں کے ساتھ دوبارہ اتحاد اور افغانستان میں طالبان کے اقتدار سنبھالنے کے بعد ٹی ٹی پی پاکستان کے سرحدی علاقوں پر دوبارہ کنٹرول قائم کرنے کی خواہشمند ہے۔ رپورٹ کے مطابق ٹی ٹی پی افغانستان میں آزادانہ طور پر فعال رہی تو علاقائی خطرہ بن سکتی ہے۔