Raza Musani 
نیویارک : امریکی صدر ڈونلڈ ٹرمپ نے یورپی یونین کی مصنوعات پر پچاس فیصد اور ایپل آئی فون پر پچیس فیصد ٹیرف عائد کرنے کی دھمکی دے دی۔ ٹرمپ نے سوشل میڈیا پلیٹ فارم ٹرتھ سوشل پر پوسٹ میں لکھا کہ یورپ کے ساتھ تجارتی مذاکرات نتیجہ خیز ثابت نہیں ہو رہے۔ یکم جون سے یورپ پر پچاس فیصد ٹیرف لاگو کرنےکی منظوری دے رہا ہوں۔ انہوں نے کہا کہ یورپ تجارت کے معاملے پر امریکا کا فائدہ اٹھانے کی کوشش کر رہا ہے۔
یورپی یونین کے ٹریڈ کمشنر ماروس سیفکووچ نے کہا ہے کہ یورپی یونین امریکا کے ساتھ دھمکیوں کے بجائے احترام کی بنیاد پر تجارتی معاہدہ کرنے کے لئے پرعزم ہے۔
اُدھر صدر ٹرمپ نے ایپل اور سام سنگ جیسی اسمارٹ فون بنانے والی کمپنیوں سے مطالبہ کیا کہ وہ اپنے فون امریکہ میں بنائیں یا پچیس فیصد ٹیرف کا سامنا کریں۔ ٹرمپ نے کہا کہ انہوں نے بہت پہلے ہی مطلع کیا تھا کہ آئی فون جو امریکا میں فروخت ہوتے ہیں یہیں تیار ہوں گے۔ نہ کہ ہندوستان یا کسی اور جگہ۔
