غزہ کیلئے استحکام فوج میں پاکستان اپنا حصہ ڈالے، ٹرمپ کا فیلڈ مارشل پر دباؤ

واشنگٹن: امریکی صدر ڈونلڈ ٹرمپ نے پاکستان کے فیلڈ مارشل عاصم منیر پر زور دیا ہےکہ وہ غزہ میں بین الاقوامی استحکام فورس میں اپنی فوج کی شمولیت یقینی بنائیں۔ برطانوی نیوز ایجنسی رائیٹر نے دو ذرائع کے حوالے سے بتایا کہ عاصم منیر چند ہفتوں میں واشنگٹن جائیں گے۔ جہاں ملاقات کا محور غزہ ہوگا۔ عاصم منیر سربراہِ مملکت نہیں ہیں لیکن فیلڈ مارشل کے عہدے نے انہیں سب سے بااختیار بنادیا ہے۔ ٹرمپ کے اقتدار میں آنے کے بعد عاصم منیر کی ان سے تیسری ملاقات ہوگی۔ رپورٹ کے مطابق بین الاقوامی استحکام فورس ٹرمپ کے بیس نکاتی امن منصوبے کا بنیادی ستون ہے، مگر کئی عرب اور مسلم ممالک تعاون کرنے سے ہچکچا رہے ہیں کیونکہ وہ اسرائیل یا امریکہ کے ساتھ تعاون کے الزامات سے خوفزدہ ہیں۔ دوحہ میں امریکی سینٹرل کمانڈ کی کانفرنس کے دوران فورس کے مینڈیٹ پر بات چیت ہوئی، لیکن تقریباً پینتالیس ممالک میں سے کسی نے بھی فوجی تعاون کا حتمی وعدہ نہیں کیا۔ حیرت انگیز طور پر اسرائیل کا اتحادی آذربائیجان بھی اب اس تعاون سے پیچھے ہٹ گیا ہے۔