Raza Musani 
اسلام آباد: امامیہ اسٹوڈنٹس آرگنائزیشن کے 54 ویں سالانہ مرکزی شہید مقاومت کنونشن میں شہید سید حسن نصر اللہ کو خراج عقیدت پیش کرنے کیلئے تقریب کا انعقاد کیا گیا، مقررین نے شہدائے راہ قدس کی قربانیوں کو خراجِ تحسین پیش کیا۔
سالانہ کنونش میں ملک بھر سے بڑی تعداد میں طلبہ، نوجوانوں اور علمائے کرام شریک ہوئے۔ شرکاء نے غزہ، لبنان اور فلسطین سمیت عالمی حالات پر گفتگو کرتے ہوئے شہید سید حسن نصر اللہ کی برسی کے موقع پر انہیں خراجِ عقیدت پیش کیا۔
کنونشن سے خطاب میں علامہ امین شہیدی نے کہا کہ غزہ جنگ نے انسانیت اور حیوانیت کے درمیان واضح لکیر کھینچ دی ہے۔ علامہ انور علی نجفی نے شہید سید حسن نصر اللہ کو دورِ حاضر کا عظیم مجاہد قرار دیا۔
سید ناصر عباس شیرازی کا کہنا تھا غزہ نے اپنی ثابت قدمی سے دشمن کو شکست دے کر کربلا کی فتح کا عملی ثبوت دیا ہے۔ آئی ایس او کے مرکزی عہدیداروں نے کہا کہ یہ کنونشن نہ صرف تعلیمی اور فکری سرگرمیوں کا مرکز ہے بلکہ امت کی وحدت اور استحکامِ پاکستان کے لیے بھی ایک عظیم کاوش ہے۔
