الشفا اسپتال میں المیہ، مزید 40 مریض دم توڑ گئے

غزہ : الشفا اسپتال میں المیہ رونما ہونے لگا۔ چند گھنٹوں میں چالیس مریض دم توڑ گئے۔ مجموعی تعداد 75 ہوگئی۔الشفا اسپتال میں ایندھن کی عدم فراہمی سے آئی سی یو میں مریض مرنے لگے۔ چند گھنٹوں میں چالیس مریض دم توڑ گئے۔ تین دن میں مرنے والوں کی تعداد 75 ہوگئی ہے جبکہ مزید کئی مریضوں کی حالت تشویشناک ہے۔
وزارت صحت کے ترجمان کا کہنا ہے کہ کمپلیکس کے اندر اب بھی متعدد لاشیں موجود ہیں جنہیں دفنانے کی ضرورت ہے۔ لیکن اسرائیلی فورسز کمپاؤنڈ کے اندر نقل و حرکت کو روک رہی ہیں۔ اس سے پہلے احاطے میں 179 افراد کو اجتماعی قبر میں دفن کیاگیا ہے جس میں سات بچے اور 29 انتہائی نگہداشت کے مریض شامل ہیں۔
شمالی غزہ کے تمام اسپتال ایندھن کی قلت اور شدید بمباری کے باعث غیر فعال ہوچکے ہیں۔ ادھر صیہونی فوج کی بمباری کا سلسلہ بھی جاری ہے۔ صیہونی جنگی طیاروں نے خان یونس۔ جبالیہ سمیت مختلف مقامات کو میزائلوں سے نشانہ بنایا جس سے عمارتیں ملبے کا ڈھیر بن گئیں۔ حملوں میں 85 افراد شہید اور درجنوں زخمی ہوگئے۔