Raza Musani 
لاہور: پنجاب اور دارالحکومت اسلام آباد میں طوفانی بارشوں نے تباہی مچادی۔ مختلف حادثات میں تریسٹھ افراد جاں بحق اور تین سو کے قریب زخمی ہوگئے۔ پنجاب میں بدھ کی صبح سے شروع ہونے والی موسلا دھار بارشوں سے ندی نالے بپھر گئے۔ اسلام آباد اور راولپنڈی میں مسلسل پندرہ گھنٹے تک جاری رہنے والی بارش سے نشیبی علاقے زیر آب آگئے۔
راولپنڈی کے نشیبی علاقوں میں سیلابی صورتحال کے پیش نظر لوگوں نے انخلا کا عمل شروع کردیا ہے۔ ایمرجنسی کی صورت میں فوج طلب کرنے کا فیصلہ کیا گیا ہے جبکہ شہریوں کو غیر ضروری سفر سے گریز کی ہدایت کی گئی ہے۔ ڈپٹی کمشنر راولپنڈی نے ضلع بھرمیں تعطیل کا اعلان کردیا۔
چکوال میں کلاؤڈ برسٹ سے صورتحال تشویشناک ہوگئی۔ وزیراعلیٰ پنجاب مریم نواز نے متاثرہ علاقوں میں رین ایمرجنسی نافذ کردی ہے۔ نیشنل ڈیزاسٹر مینجمنٹ اتھارٹی نے آج رات تک مزید طوفانی بارشوں کی پیش گوئی کی ہے۔
