شہدائے پاراچنار کی نماز جنازہ میں ہزاروں افراد کی شرکت، آبائی علاقوں میں تدفین

پاراچنار: ضلع کرم کے علاقے تری مینگل میں شہید اساتذہ کی نماز جنازہ مرکزی امام بارگاہ پاراچنار میں ادا کردی گئی۔ اجتماعی نماز جنازہ میں ہزاروں کی تعداد میں لوگوں نے شرکت کی۔ نماز جنازہ کے بعد سوگواروں نے جنازوں کے ساتھ جلوس کی شکل میں پریس کلب تک مارچ کیا۔ پریس کلب پہنچ کر جلوس نے جلسہ کی شکل اختیار کرلی۔ جلسے سے متعدد مقررین نے خطاب کیا۔ ہیڈ ماسٹرز یونین کے حاجی اقبال حسین نے ہائی اسکول تری منگل کی صورتحال پر روشنی ڈالی۔ انہوں نے کہا واقعے کے لئے ایجوکیشن آفس کو مورد الزام ٹھہرایا۔ مقررین نے واقعے کو ایک سوچی سمجھی سازش قرار دیا۔ انہوں نے عوام سے پرامن رہنے کی اپیل کرتے ہوئے کہا کہ وہ دہشتگردوں اور جاہل اقوام کی طرح کوئی غیر سنجیدہ کام سرانجام نہ دیں۔ کسی غیر متعلقہ شخص کو کسی قسم کا گزند نہ پہنچایا جائے۔ بعد میں شہدا کے جنازوں کو جلوس کی شکل میں اپنے اپنے آبائی علاقوں کی طرف روانہ کیا گیا۔ شہدا کا تعلق کڑمان، شلوزان اور دوراوی کے بنگش قبائل سے ہے۔ انہیں آبائی علاقوں میں سپرد خاک کردیا گیا۔