فلسطینی ریاست کے بغیر خطے میں امن نہیں ہوگا، روسی صدر

پیوٹن : روسی صدر ولادیمیر پیوٹن کا کہنا ہے کہ فلسطینی ریاست کا قیام ایک اصولی مسئلہ ہے، جس کے بغیر خطے میں پائیدار امن ممکن نہیں۔ کریملن میں متحدہ عرب امارات کے صدر محمد بن زاید النہیان کے ساتھ ملاقات میں ولادیمیر پیوٹن نے کہا کہ ایک مکمل خودمختار فلسطینی ریاست کا قیام، جو اسرائیل کے ساتھ امن اور سلامتی کے ساتھ موجود ہو، دیرپا حل کی بنیاد بن سکتا ہے۔ یہی راستہ خطے میں طویل المدتی استحکام کو یقینی بنا سکتا ہے۔ روسی صدر نے یہ بھی کہا کہ ایران سے متعلق صورتحال پر روس گہری نظر رکھے ہوئے ہے، خاص طور پر امریکا کے صدر ڈونلڈ ٹرمپ کی جانب سے حملوں کی دھمکی کے بعد۔ پیوٹن نے یوکرین بحران کے حوالے سے متحدہ عرب امارات کے کردار کو سراہا، جن میں قیدیوں کے تبادلے اور سفارتی رابطوں کے لیے پلیٹ فارم فراہم کرنا شامل ہے۔