عمران خان کی زندگی کا کوئی ثبوت موجود نہیں، بیٹا قاسم خان

اسلام آباد : سابق وزیراعظم عمران خان کے چھوٹے بیٹے قاسم خان نے والد کی زندگی سے متعلق خدشات ظاہر کردئے۔
انہوں سوشل میڈیا پر لکھا کہ والد کو کچھ ہوا تو ذمہ دار حکومت ہوگی۔ سوشل میڈیا پر پیغام میں قاسم خان نے کہا ہے حکومت نے خاندان تک تمام رسائی منقطع کر دی ہے۔ خاندان کے پاس والد کے زندگی کا کوئی ثبوت نہیں ہے۔
انہوں نے لکھا کہ والد کی بہنوں کو اُن سے ملاقات نہیں کرنے دی جا رہی، حالانکہ عدالت کے واضح احکامات موجود ہیں جن میں انھیں بھائی سے ملاقات کا حق دیا گیا ہے۔ قاسم خان نے اپنی ایکس پوسٹ میں یہ دعویٰ بھی کیا ہے کہ عمران خان سے نہ کسی فون کال پر رابطہ ہوا ہے نہ ملاقات اور نہ ہی اس بات کی کوئی تصدیق کی جا رہی کہ وہ زندہ ہیں۔ میں اور میرا بھائی سلمان اپنے والد سے کسی قسم کا رابطہ نہیں کر سکے۔ انھوں نے یہ دعویٰ بھی کیا کہ یہ مکمل بلیک آؤٹ کوئی حفاظتی پروٹوکول نہیں ہے۔ یہ ان کی حالت کو چھپانے اور ہمارے خاندان کو یہ جاننے سے روکنے کی دانستہ کوشش ہے کہ آیا وہ محفوظ ہیں یا نہیں۔ قاسم خان نے ایکس پر اپنے بیان کے آخر میں عالمی برادری، بین الاقوامی انسانی حقوق کی تنظیموں سے اپیل کرتے ہوئے کہنا تھا کہ وہ فوری طور پر ان معاملات میں مداخلت کریں۔ یہ تمام ادارے عمران خان کی زندگی کی تصدیق کا مطالبہ کریں، عدالت کے حکم کے مطابق اُن سے ملاقات اور اُن تک رسائی کو یقینی بنائیں۔